अनिष्ट संकेत देखापरेको भन्दै जनजातिद्वारा संविधानसभा अगाडि आकस्मिक धर्ना

काठमाडौं, जेष्ठ ११ 
नेपाल आदिवासी जनजाति महासंघले संविधानसभा विघटन हुने अनिष्ट संकेत देखापरेको भन्दै मंगलबार दिउँसोदेखि आकस्मिक धर्ना सुरु गरेको छ ।
संविधानसभाको पश्चिमतर्फ महासंघका पदाधिकारीहरु धर्नामा बसेका छन् । संविधानसभा विघटन गरी मुलुक गम्भीर संकटमा पर्न लागेको भन्दै शान्ति र नयाँ संविधान प्राप्तिका लागि आगाडि अनिश्चितकालीन धर्ना सुरु गरिएको महासंघका अध्यक्ष राजकुमार लेखीले जानकारी दिए ।
महासंघको मंगलबार बिहान बसेको आकस्मिक बैठकले धर्ना दिने निर्णय गरेको थियो । संविधान बनाउनुपर्ने संविधानसभा विघटनको संघारमा पुग्नु अनिष्टको तयारी भएको भन्दै संविधानसभाको बचाउका लागि धर्ना दिने निर्णय गरेको लेखीले जनाएका छन् ।
संविधानसभा विघटन भए सबैभन्दा पीडित आदिवासी जनजाति, सीमान्तकृत, मधेसी, दलित र अल्पसंख्यक जाति नै बन्ने भएकाले संविधानसभा जोगाउन धर्ना सुरु गरिएको महासंघले जनाएको छ । महासंघले यसअघि पनि संविधानसभा विघटन हुनबाट जोगाएर अल्पकालका लागि म्याद थप्न आग्रह गरेको थियो ।
आदिवासी जनजाति महासंघले सुरु गरेको अनिश्चितकालीन धर्नामा सभासदहरु शान्ता चौधरी, टासी  गुरुङसेनी, सोनाम छेदुङ तथा राज्य पुनर्संरचना आयोगका अध्यक्ष गणेशमान गुरुङले पनि धर्नास्थलमा पुगेर ऐक्यवद्धता जनाएका छन् ।